CEBU, Philippines - Karong sunod semana pakigtagboan ni Mayor Michael Rama ang mga kontraktor nga gi-hire sa Department of Public Works and Highways (DPWH) sa pagpang-aspalto sa mga karsada dinhi sa dakbayan.
Wala gayud malipay si Mayor Rama nga daghang mga karsada nga gipangguba sa mga kontraktor nga gi-hire sa DPWH apan gipangbiyaan lang sulod sa pipila ka semana nga nakasakripisyo sa mga motorista.
Si Engr. Lito Catubig sa DPWH-Cebu City District miingon nga dili kini ila’ng proyekto ang pagpang-aspalto sa daghang mga karsada kay iya kini sa DPWH-7 regional office.
Apan nangayo gihapon og pasaylo si Engr. Catubig ngadto sa publiko tungod kay nakita niya nga nakahimo gayod og sayop ang mga kontraktor nga gikuha sa DPWH.
Ang sayop sa mga kontraktor mao ang pagguba nila sa karsada apan wala dayon aspaltoha ug gibiyaan nga ang uban miabot og duha ka semana nga nag-antos ang mga motorista. Matud ni Mayor Rama nga wala gayud siya malipay tungod sa gihimo sa mga kontraktor hinungdan nga ipatawag niya kini aron pangayoan og inpormasyon kanus-a mahuman ang ilang proyekto.
Nakabantay ang Banat Manobela og posible nga kalapasan sa pagpahigayon og bidding sa mga proyekto sa pagpang-aspalto sa mga karsada.
Ang lagda mao nga ang mga proyekto nga kantidad og labaw na sa P50 milyones ang DPWH regional office na ang magdumala sa proyekto.
Apan gikahibudngan kay ang proyekto nga pag-aspalto sa Gorordo Avenue nagkantidad ra man og P33.9 milyones apan sa gihapon ang DPWH regional office man ang nagdumala.
Adunay nagduda nga gibuak-buak sa DPWH ang mga proyekto ug gihatag kini sa lainlaing mga kontraktor. (BANAT NEWS)