CEBU, Philippines - Ang mga opisyal sa dakbayan sa Talisay hangtod karon wala pa makatubag sa Ombudsman-Visayas kun ngano nga kanunay lang moulbo ang kayo sa labayanan og mga basura sa Barangay Tapul.
Gikan kaniadtong Marso 20, si Mayor Johnny V. De los Reyes gimandoan sa Ombudsman nga mosumiter sila og tubag nga dili molapas sa 30 ka adlaw.
Ang kamandoan sa Ombudsman ngadto sa mayor gibasi sa napublikar nga report sa mantalaan nga ang mga molupyo sa Barangay Tapul nangreklamo tungod sa subsob nga sunog sa labayanan og mga sagbot sa Talisay.
Sa interview sa Banat News kagahapon, si Talisay City Legal Officer Alfredo Sipalay miingon nga kutob na lang karong adlawa ang gitagal kanila sa Ombudsman. Apan ang suwat sa Ombudsman nadawat sa Talisay kaniadto pa lang Marso 20.
Matud ni Sipalay nga paninguhaon niya nga karong adlawa makapadangat na siya og tubag sa maong suwat nga gipadala sa Ombudsman.
Gimandoan sa Ombudsman si Mayor JVR nga imbestigahon ang posible nga paglapas sa mga lagda sa Ecological Solid Waste Management Act ilabi na ang Section 37 nga nagdili na sa mga “open dumpsiteâ€.
Ang lagda sa Republic Act 9003 mao nga ang mga basura kinahanglang tabonan og lapok ug ubang filling materials aron malikayan ang pagkasunog ug masunod ang tukma nga paghipos sa basura.
Nasayran nga ang mga kawani sa city engineering migama na og aksiyon diin gipakubkuban nila ang ilawom sa mga basura ug gipabombahan og tubig aron pagpawong sa kayo ug dayon gipatabonan og anapog.
Apan wala gihapon kini makasulbad sa problema kay niining ulahi lang miulbo na usab ang pond C sa landfill. Matud ni Sipalay nga ang siyudad duna nay gitahasan sa pagpahigayon og pagtuon alang sa hingpit nga kasulbaran sa maong problema. (BANAT NEWS)