Mga batan-on tugotan paghimo’g deboho sa mga koral nga semento

CEBU, Philippines - Hatagan og pagtugot ni Mayor Jonas Cortes ang mga batan-on nga mahiligon sa pagdeboho nga pintalan nila og decorative design ang mga paril nga semento nga nahimutang sa kadalanan sa dakbayan.

Ang Cebu Kaabag Leon’s Club ug ang kahugpongan sa mga batan-on sa kabarangayan maoy gitahasan sa mayor sa pagpamintal atol niining panahon sa ting-init. Abagan sila ni AJ Sano nga giilang Dolphin guy Artist gikan sa Disneyland.

Tumong sa gitinguha’ng desinyo nga ipintal sa mga paril nga semento mao ang pagpadangat sa mensahe ug adbokasiya sa kagamhanan kabahin sa pagpanalipod sa kalikupan ug ang pagdili sa paghimo og paghugaw-hugaw.

Ang pagpintal og mga decorative design nga nagdala og mensahe nga naglambigit sa kalikupan maoy tugbang sa gihimo sa pipila ka pundok sa mga batan-on nga paghugaw-hugaw sa mga paril nga semento nga gigamit ang pintal nga nakalapas usab sa anti-vandalism ordinance sa dakbayan.

Ang mga koral nga unahon sa pagpintal sa grupo sa mga batan-on nahimutang sa dalan Plaridel sa Barangay Alang-Alang nga mao usab ang unahon sa paghimo’g desinyo sa artist nga si AJ Sano.

Si Mayor Cortes miingon nga dugang mga dalan nga adunay paril nga semento ang malakip sa pagpamintal sa grupo sa mga batan-on panahon sa summer mao ang dalan A.S. Fortuna, M.C. Briones, S.B. Cabahug, dalan P. Burgos ug uban pa.  (BANAT NEWS)

Show comments