CEBU, Philippines - Nawad-an sa iyang salapi ug mahalon nga mga butang ang usa ka babayeng call center agent human gitulis sa nagbinugtong nga armadong lalaki nga nagsakay og motorsiklo sa dalan A. del Rosario sa Barangay Guizo, dakbayan sa Mandaue kagahapon sa kaadlawon.
Ang biktima mao si Gisela Gestopa, 28, taga dalan Zamora, Barangay Centro sa maong dakbayan. Ang tulisan gibanabanang 20-anyos ug nagsul-ob kini og closed- type helmet.
Si PO2 Jesson Estrera sa kapolisan sa Presinto 1 sa Mandaue City Police Office (MCPO) miingon nga gikan pa sa iyang trabaho ang biktima ug padulong na unta kini pauli dihang gibabagan sa lalaking nagmotor ug gitionan og armas dayong deklarar og tulis.
Nakuha sa tulisan ang shoulder bag sa biktima nga adunay sulod nga Samsung cellphone nga P15,000 ang kantidad, cash nga P9,000, PRC Identification Card, TIN ug mga ATM niini sa bangko. (BANAT NEWS)