CEBU, Philippines - Gipusil ug gipatay ang usa ka mag-uuma didto sa Barangay Kamansi, Tuburan pipila ka gutlo human sa iyang panihapon kaniadtong Domingo sa gabii.
Nanghunaw na unta ang 57-anyos nga si Antonio Songahid dihang gipusil siya sa wala hiilhing tawo nga didto nanukad sa gawas sa ilang balay ug maayo’ng pagkaigo sa iyang tiyan.
Ang biktima midali pagdagan paingon sa sulod sa balay apan giusban kini pagpusil ug maayong pagkaigo sa iyang sampot. Usa niya ka silingan nga si Benjamin Dichos maoy mipahibalo sa kapolisan kabahin sa mao nga pagpamusil ug gitoohan nga duha ka tawo ang responsable.
Si PO1 Joseph Bejer, sakop sa Tuburan Police Station, miingon ang bala nga mitama sa tiyan sa biktima milapos sa iyang buko-buko. Nakapangayo pa’g tabang ang biktima sa iyang asawa mao nga siya gigakus apan taud-taud nabugtoan kini sa kinabuhi.
Ang mga miresponde nga kapolisan nakakaplag og duha ka kabhang ug usa ka slug sa kalibre .45 nga pistola.
Ang asawa ni Songahid mitug-an sa kapolisan nga ang iyang bana nakadawat og hulga gikan sa usa ka Liclic Molinas nga taga Barangay Tumugpa, Tuburan apan imbestigahon pa kini sa mga polis. (BANAT NEWS)