CEBU, Philippines - Kritikal ang kahimtang sa mama sa kontrobersiyal nga treasurer sa barangay Captain Claudio sa Toledo City human kini gipaulanan og bala sa duha ka lalaki sulod sa iyang tindahan sa nahisgutan pasado alas 3:00 sa miaging hapon.
Ang biktima naila nga si Lilia Pellerin, 65, nga naigo sa nagkalain-laing bahin sa iyang lawas. Si Pellerin mao ang inahan sa tresurera nga gireklamo ni Kapitan Alexander Alqueza ug kapuyo niining si Konsehal Irene Wamilda.
Si Wamilda namatay human gi-ambush uban ni Alqueza (kinsa naangol sab) gikan nisang-at og reklamo sa Ombudsman batok sa kanhi tresurera nga si Marlyn Gonzales usa ka semana na ang milabay.
Samtang ang mga suspetsado naila nga sila si Antonio Juarez, 56, taga sitio Tisa, barangay Sangi sa dakbayan sa Toledo ug si Alden Mahusay,38, nga taga barangay Canlumampaw sa dakbayan sa Toledo.
Si PO3 Salvador Samillano, desk officer, nga nahinabi sa Banat News miingon nga ang biktima nagbantay sa iyang tindahan dihang miabot ang duha ka lalaki nga sakay sa motorsiklo ug mipusil sa biktima sa pipila ka higayon.
Ang anak sa biktima nga nakakita sa mga suspek misunod kanila ug mitawag gilayon og tabang sa kapolisan.
Nasikop sa kapolisan ang mga suspek diha sa sitio Tisa sa barangay Sangi ug narekober gikan kanila ang motor nga ilang gigamit, usa ka kalibre .38 nga revolver nga may lima ka bala.
Narekober sab sa kapolisan sa crime scene ang usa ka kabhang sa kalibre .45 ug duha ka slugs sa maong armas. Ang biktima dali sab nga gidala sa Toledo City Hospital nga nakaangkon og samad sa iyang tuong aping, liog, tuong kamot, duha ka igo sa iyang walang kilid ug usa sa iyang walang dughan.
Tungod niini gibalhin ang biktima sa usa ka tambalanan sa dakbayan sa Sugbo. Gipasakaan na og kasong frustrated murder ang duha ka suspetsado sa piskaliya sa dakbayan sa Toledo kagahapon sa hapon. (BANAT NEWS)