CEBU, Philippines - Bag-ong programa sa Department of Labor and Employment (DOLE) labot sa pagpatuman sa balaud, iimplementar sugod karong tuiga.
Kini human namugna sa DOLE sa hinapos nga bahin sa niaging tuig ang bag-ong pamaagi ubos sa labor laws compliance system, pinaagi sa pagsusi kung gipatuman ba sa usa ka establisemento ang balaud sa pamuo.
Atol sa 888 News Forum sa Marco Polo Plaza kagahapon, gibutyag ni DOLE 7 assistant director Lilia Estillore nga aduna sila’y 372 ka bag-ong labor laws compliance officers hulip sa kanhi mga labor inspectors.
Matud pa ni Estillore nga ubos sa bag-ong sistema, ang usa ka kompaniya hatagan og higayun nga boluntaryong mopatuman sa balaud sa pamuo.
Sagad sa mga problema sa pamuo ang wala pagpatuman sa minimum nga suholan sa mga mamumuo ilabi na sa gagmay’ng mga pamatigayon, matud pang Estillore.
Laing problema nga gitumbok ni Estillore mao ang kakuwang sa gamit alang sa seguridad sa mga trabahante ilabi na sa mga construction companies.
Ang sobra sa oras sa pagpatrabaho ilabi na sa mga segurity guards ang laing problema nga nakit-an sa DOLE diin ang usa ka gwardiya mo-duty og 12 ka oras nga kalapasan na sa normal nga walo ka oras nga trabaho. (BANAT NEWS)