CEBU, Philippines - Tungod sa tsismis napusilan angol ang usa ka lalaki sa iyang silingan sa sitio Kasagingan, barangay Banawa ning dakbayan sa Sugbo kagahapon sa buntag.
Ang biktima naila nga si Noel Pilapil, 34, pintor, molupyo sa maong lugar. Ang suspetsado naila nga si Dario Berano, 38, molupyo sa samang lugar.
Matud pa ni PO2 Reoful Adalim sa Homicide Section sa Cebu City Police Office nga mitug-an ang kapuyo sa biktima nga si Anita Cortes, nga didto sa gawas sa ilang balay ang biktima sa maong higayon, nga naghuwat kaniya kay manglakaw sila.
Unya kalit lang miduol si Dario ug mipusil sa biktima sa makaduha ka higayon gamit ang wala pa mailhi nga armas.
“Gahuwat daw ning biktima sa iyang kapuyo sa gawas sa ilang balay, unya kalit ra nga niduol tong si Dario gipusil siya sa makaduha,†sumala pa ni Adalim.
Naigo ang biktima sa iyang tuong kamot ug sa iyang tuong liog ug dali kining gihatod ngadto sa Vicente Sotto Memorial Medical Center.
Matud pa ni Adalim nga gisaysay usab sa kapuyo sa biktima nga gipusil sa suspetsado ang biktima tungod sa tabi-tabi nga nadunggan niini.
Kini bahin sa giingong namabaye ang suspetsado, apan tungod kay dili tinuod nasuko kini ug gipusil ang biktima. (/WC)(BANAT NEWS)