Kasadya sa SRP gihugopan apan daghang mireklamo

CEBU, Philippines - Ang Kasadya sa SRP padayong gihugopan sa daghang mga tawo matag gabii apan daghang mga tawo nga edad-edaran na ang nangreklamo tungod kay wala sila’y dapit nga adto sila makapahuway sama sa paglingkod.

Laing gireklamo sa mga senior citizens nga nahinabi sa Banat News mao nga layo kaayo ang pansayan nga magamit gikan sa dapit nga gipahigayon ang mga kalingawan.

Gatusan ka mga tawo ang mag-ambahan sa SRP matag gabii diin adunay lainlaing kalingawan nga gipahigayon. Matud ni City Market Administrator Raquel Arce nga maoy nagdumala sa kalingawan nga tan-awon nila unsay paagi nga masulbad ang reklamo sa mga seniors. Apan laing reklamo usab mao ang giingong pagkatanggong sud sa pipila ka minutos sa 30 ka bata ug hamtong sa usa sa mga rides niini nga mikagar tungod sa problemang mekanikal dili pa lang dugay.

Si Bo Vasquez, SRP Office Head mibutyag nga dili depektoso ang makina sa cable car rides kondili ang supply sa kuryente sa Visayan Electric Cooperative (VECO) maoy hinay.

Gimando na hinuon ni Mayor Michael Rama nga ipainspeksyon  sa Office of the Building Officials (OBO) ang mga ekipo sa maong rides.

Kinahanglan usab nga mokuha og clearance sa OBO ang operator sa maong rides una pa sila tugutan nga makabalik og padagan sa ilang rides. Ang Mandaue City aduna sa’y kalingawan nga gipasiugdahan sa usa ka pribadong kompaniya apan gihulagway nga mas bentaha ang Kasadya sa SRP kay walay entrance fee sa mga mosulod ug barato pa ang bayranan sa mga “rides.”

Sa Carnival sa Mandaue ang mga mosulod pabayron og tag P50 ug tag P75 ang bayad sa mga mosakay og “Tyobibo” ug ubang matang sa mga “rides.” Matud ni Arce nga sa SRP walay entrance fee ug tag P25 ngadto sa P40 lang ang bayad sa mga rides.

Matud ni Mayor Michael Rama nga gituyo nila nga ilang gisabot ang tigpasiugda sa mao nga Carnival nga dili mahalon ang bayranan aron nga malingaw ang katawhan.  (BANAT NEWS)