Namaak gisanggot sa ulo

CEBU, Philippines - Gisanggot sa usa ka mananggiti ang usa ka babaye nga mipaak kaniya human kini nanaog sa lubi nga iyang gisanggotan sa sitio Canipaan sa barangay Poblacion Uno sa lungsod sa Malabuyoc sa alas 7:30 sa miaging gabii.

Ang biktima naila nga si Lorita Flores, 50, may live-in partner, sitio Canipaan sa barangay Poblacion Uno sa lungsod sa Malabuyoc.

Samtang ang suspetsado naila nga si Paulito Lepana, molupyo sa samang lugar.

Matud pa ni SPO1 Allan Almedilla, desk officer sa Malabuyoc Police Station nga nahinabi sa Banat News nga nag-away ang biktima ug ang iyang live-in partner nga si Allan Baldadlo.

Sumala pa ni Almedilla nga samtang didto sa taas sa lubi ang suspetsado misambat kini sa pag-ingon nga “nganu’ng namana og gwapo” hinungdan sa kasuko sa biktima.

Tungod sa kalagot sa biktima iya kining giatangan nga manaog sa lubi ug gidiretso og paak.

Dihadiha gisanggot sa suspek ang ulo sa biktima hinungdan sa dako kaayong samad nga naangkon niini.

Ang biktima daling gidala sa M.J. Cuenco Memorial Hospital sa Malabuyoc ug gibalhin kini sa Vicente Sotto Memorial Medical Center.

Kasamtangang natanggong ang suspetsado sa Malabuyoc Police Station samtang naghuwat nga pasakaan kini og tukmang kaso. (/EIM)(BANAT NEWS)