CEBU, Philippines - Tungod sa total blackout sa kuryente kagahapong adlawa, nakasinati ang mga customers sa Metropolitan Cebu Water District nga walay tubig sulod sa duha ka oras ug posibleng magpadayon kini sa ubang lugar nga apektado.
Matud pa ni Ernesto Delco, ang MCWD assistant general manager for operations nga sugod alas 11:00 sa buntag hangtud sa alas 12:00 sa udto, nawala ang tubig tungod kay nahurot usab ang tubig sa ilang reservoir. Kagahapong adlawa, nahibalik na hinoon sa MCWD ang 50,000 cubic meter sa ilang supply o 25 porsiyento sa ilang tibuok nga produksiyon tungod sa pag-apud apod sa mga gensets.
Apan matud pa ni Delco nga layo pa kini sa ilang target nga produksyon nga 100,000 cubic meter nga tubig matag adlaw.
Nagkanayon si Delco nga sa "worst case scenario" diin magpadayon ang brownout sulod sa 48 ka oras, ang MCWD mapugos paghimo og water service rotation or water rationing sa mga apektadong lugar. "There will be a water service interruption gyud, kung magpadayon ang blackout," matud pa ni Delco.
Mipasalig si MCWD general manager Armando Paredes nga walay pasilidad ang MCWD nga nadaot tungod sa bagyo. (/EIM) (BANAT NEWS)