CEBU, Philippines - Nadakpan atol sa buy bust operation sa kapolisan ang kaluha nga tiggamitay og gidiling drugas didto sa barangay Maslog, siyudad sa Danao niadtong Martes sa alas 5:30 sa hapon.
Ang naa sa prisohan mao sila si Ryan Mahusay, ug Brayan Mahusay, pulos 26, ug pulos ulitawo, nga molupyo sa nahisgutang lugar.
Si Ryan nakuhaan og 6 ka gagmay’ng pakite sa shabu ug laing upat usab ka pakite ang nakuha sa posisyon ni Brayan.
Apan nakahigayon sa pag- eskapo ang subject sa buy bust nga si Paul Barkeiso, hingkod, ug nagpuyo sa maong lugar human kini makamatikod nga polis ang iyang ka-transaksiyon.
Si PO2 Roselo Campo sa Danao City Police Station mibutyag sa Banat News nga milusad sila og buy bust operation human kini makadawat og impormasyon sa suspek nga namaligya og shabu sa maong lugar. Si Insp. Romeo Caacoy maoy nangulo sa operasyon gamit ang polis nga nagsilbing poseur buyer ug mipalit kini og shabu apan dihang gitunol sa suspek ang butang kalit kining milayat sa koral ug kusog kaayong nakadagan pahilayo ug wala na hiapsi sa mga polis.
Hinuon nadakpan ang duha nga kaluha nga gituohang customer nga nasakmitan og 10 ka pakite nga shabu.
Nabalhug na karon sa karsel ang duha ka dinakpan samtang gipasaka na ang kaso batok kanila ug apil sa gipasakaan og kaso ang suspek nga gidungog na nga mamaligyaay og gidiling drugas sa lugar. (BANAT NEWS)