Giluba sa bayaw kritikal

CEBU, Philippines - Kritikal ang kahimtang sa  usa  ka  ulitawo human kini dunggaba  sa  iyang  bayaw  didto  sa  barangay  Malbago, lungsod sa Madredijos isla sa Bantayan   sa miaging gabii.

Ang biktima mao si George Disperodrigo, 21, ulitawo, usa ka mananagat ug nagpuyo sa maong lugar.    

Samtang ang suspek mao si Jeomar Oriope, 27, minyo, usa ka mananagat ug bayaw sa biktima.

Si PO1 Roberto Aloba sa Madredijos Police Station mibutyag  sa  Banat News  nga ang suspek mipauli nga hubog maoy  hinungdan nga  gikasab-an sa asawa ug misangpot sa ilang panag-away.

Ang biktima nga natulog niadtong higayona  sa sala sa  ilang  balay  maoy nakit-an sa suspek samtang gisigihan kini og yawyaw sa iyang asawa.

Tungod sa kalagot mikuha kini og kutsilyo dayon gidunggab niini ang biktima nga naghigda   sa maong  higayon.

Maayong pagka-igo sa kilid nga bahin sa tiyan sa biktima ug dali kining gitabang sa igsoon ug mga silingan ug  gihatud sa Bantayan District hospital apan gi-transfer dayun sa tambalanan dinhi sa dakbayan sa Sugbo.

Samtang ang suspek nadakpan  sa nirespondi nga mga polis  ug nabalhug na karon sa karsel samtang gihikay ang kasong ipasaka batok  kaniya. (BANAT NEWS)