CEBU, Philippines - Kritikal ang kahimtang sa usa ka 39-anyos nga ulitawo human gidunggab sa anak sa byuda nga iyahang giuyab-uyab diha sa barangay Colonia sa lungsod sa Tuburan niadtong Miyerkules sa alas 5:50 sa hapon.
Ang biktima mao si Mario Sensiro,39, lumad nga taga Negros Oriental apan kasamtangang nagpuyo sa maong lugar.
Samtang ang suspek mao si Ronaldo Bejogan, 37-anyos, ulitawo ug anak ni Argelina Bejogan,53-anyos, byuda nga giingong gika-relasyon sa biktima.
Matud ni PO1 Manaaron Alfeche sa Tuburan Police dihang nahinabi sa Banat News ang biktima ug ang inahan sa suspek nag-estoryahay kini didto sa pinuy-anan sa suspek ug pagkahuman nila og estorya samtang nipauli na unta ang biktima gisundan kini sa suspek ug gidunggab sa tiyan ug bukobuko. Ang biktima gihatud sa Balamban District hospital ug padayun pang gi-atiman sa mga doctor.
Samtang ang suspek padayun pang gipangita sa kapulisan sa paghimo ning balita. Nagduda ang mga polis nga wala makauyon ang suspek sa biktima nga ikarelasyon sa iyang inahan. (BANAT NEWS)