CEBU, Philippines - Maayong pagkapusa sa ulo sa usa ka lalaking giingong tuyo nga nagpaligis sa Ceres Bus diha sa highway sa barangay Puente sa lungsod sa Carmen niadtong Miyerkules sa alas 9:40 sa gabii.
Ang biktima nga patay dihadiha mao si Rolando Pongaotan, 34, nagpuyo sa barangay Luyang sa maong lungsod.
Ang drayber nga nakaligis kaniya mao si Josephus Tellidua, 49, nagpuyo sa Pundol barangay Binabag sa lungsod sa Pinamungajan kinsa mitahan dayon sa kapolisan human sa hitabo. Matud ni SPO2 Simplecio Gibo sa Carmen Police dihang nahinabi sa Banat News nakit-an ang biktima nga nagsusapinday og lakaw tungod sa kahubog diha sa dalan.
Apan sa paglabay sa bus nga padung sa amihanan giingong kalit kining mihigda sa agianan niini ug wala na madala pa sa drayber nga maka-brake gumikan sa kapaspas sa gibuhat sa biktima.
Sumala pa nga maayong pagkapusa sa ulo sa biktima ug patay na pag-abot sa Danao City District Hospital sa syudad sa Danao.
Human sa hitabo mitahan ang drayber sa kapulisan ug gikatakdang pasakaan og kasong reckless imprudence resulting to homicide. (/EIM) (BANAT NEWS)