CEBU, Philippines - Subling gibalik sa mga awtoridad sa Mactan Cebu International Airport (MCIA) ang pagpahubo sa sapatos sa mga pasahero niini nga mosulod sa departure area sa maong tugpahanan.
Matud pa ni Mary Ann Demabayao ang hepe sa Public Information Office sa MCIA sukad nga adunay hulga sa terorismo lakip na sa seguridad sa Sugbu giisa sa security condition two ang pagbantay sa tugpahanan.
Sa maong security condition mas hugot pa ang pag-inspeksyon sa mga pasahero sa tugpahanan.
Gumikan niini si MCIA Gen. Manager nga si Engr. Paul Villarete miluwat og kamanduan sa pagpahubo pag-usab sa mga sapatos sa tanang moagi sa domestic ug international ug departure areas.
Sa milabay’ng mga bulan giundang sa MCIA ang maong pagpahubo sa mga sapatos kay makahatag kini og kalangay sa mga pasahero ilabi na kung peak season.
Apan gibalik kini sukad niadtong milabay nga semana alang sa seguridad sa tanan. Susamang kahigpit sa seguridad ang gipatuman sa Cagayan de Oro nunot sa pagpamomba didto duha ka semana ang milabay nga miresulta sa kamatayon sa walo ka tawo ug kapin 40 ang naangol.( /EIM) (BANAT NEWS)