CEBU, Philippines - Gipasakaan sa Cebu City Prosecutor’s Office og five counts of child abuse ang usa ka polis ngadto sa korte human kini nang maltrato sa iyang mga humabdos.
Matud ni state prosecutor Gandhi Truya nga base sa ebidensya naa gyuy igong basehan aron kasohan ang maong polis kansang pangalan gipugngan sa Banat News tungod sa kasensitibo sa maong kaso ug naglambigit sa pamilya.
Mirekomendar si Truya og P400,000 nga piyansa alang sa iyang temporaryong kagawasan.
Base sa complaint sa 6-anyos nga batang babaye nga niadtong Nobiyembre 5, 2012 sa alas singko sa hapon gimandoan siya sa ama-ama sa paghubo sa iyang mga sinina ug gipaambak-ambak siya og 500 ka jumping jacks tungod kay wala siya makatubag sa pangutana sa math subject.
Apan pagkasunod adlaw, matud pa nga gipa-recite siya sa akusado og “Three Little Pigs†apan wala siya makasag-ulo niini nga giingong gikasuko sa iyang ama-ama.
Tungod niani mikuha ang akusado og long nose pliers ug gigamit kini sa pagbira sa dila sa bata. Matud pa gibunalan siya sa akusado sa dihang midagan unta siya palayo.
Samtang ang 9-anyos nga batang lalaki nga maguwang sa 6-anyos mitug-an sa iyang affidavit nga niadtong Nobiyembre 3, 2012 alas- 5 sa hapon gihapak siya sa akusado sa iyang ulo ginamit ang sapatos niini, dayun patid sa iyang tiyan ug sukmag sa iyang tuo nga mata tungod kay wala siya makasag-ulo sa pag-ampo.
Niadtong Nobiyembre 5, 2012 ang mao gihapong batang lalaki mitug-an nga gipahukas siya sa akusado ug gipabalik-balik siya og lakaw tulo ka higayon padung sa usa ka fast food chain tungod kay wala siya makatubag sa pangutana niini sa Math. Nianang pagkasunod adlaw gikatahong giingnan sila sa maong akusado nga silang mga humabdos niya walay katungod pagpuyo sa iyang panimalay.
Pagkahuman niini, gimandoan sila sa pag-perform og jumping-jack, push-ups ug stork walk sama sa himoon sa trainings sa military ug kapolisan sa sud sa pipila ka oras ug wala sila pakan-a niini.
Gawas sa mga bata mipasaka usab og kasong paglapas sa Republic Act 9262 o Violence Against Women and Children ang inahan sa mga bata batok sa akusado apan giingong gibasura kini ni Truya kay walay igong basehan. (BANAT NEWS)