CEBU, Philippines - Ang Cebu City Hall mitugot na kagahapon sa 45 ka pamilya nga apil sa nasunogan diha sa Sitio Bato, Ermita kaniadtong Abril 20 nga makatukod pagbalik sa ilang panimalay sa dapit nga giila nila nga “Phase 2.â€
Si Mayor Michael Rama maoy mihimo sa una nga pagpanghatag sa tag napulo ka plego nga sin, ug tag napulo ‘sab ka plego nga plywood sa matag usa sa 45 ka pamilya nga biktima sa sunog.
Ang nahabilin nga kapin sa 100 ka pamilya nga nasunogan dili pa matugotan nga makatukod pagbalik sa ilang balay kay padayon pa ang mga heavy equipment sa City Hall sa pagpahigayon sa clearing operation.
Kadtong kaniadto dagat nga gitukoran sa kabalayan nga nangaugdaw sa sunog gitambakan og mga lapok aron nga mapahimutang na ang mga balay nga dili na magpatong sa tubig.
Si Mayor Rama miadto sa Sitio Bato, Ermita kagahapon gipunsisokan sa mga tawo nga nangalipay nga gipanghatagan sila og construction materials nga magamit pagtukod pagbalik og balay.
Matud ni Harold Alcontin, usa ka sakop sa City Hall Clearing Team, nga ang matag pamilya gihatagan og tag 16 metros nga luna nga katukoran sa ilang balay. (Rene U. Borromeo/EIM) (BANAT NEWS)