CEBU, Philippines - Ipadayun sa bag-ong napiling mayor sa lungsod sa San Remigio, Mariano Martinez, ang gisugdan na unta sa iyang kaatbang nga si Mayor Jay Olivar nga katukuran sa Cebu Technological University campus sa ilang lungsod.
Si Martinez nga mibisita sa buhatan ni acting Governor Agnes Magpale kagahapon ug miingon nga ang pagbutang sa CTU campus sa ilang lungsod ang usa sa iyang mga saad sa kampanya sa niaging eleksiyon. Sa niaging tuig, usa ka memorandum of understanding (MOU) ang gilagdaan tali sa buhatan ni Kong. Benhur Salimbangon, CTU ug sa lokal nga kagamhanan sa lungsod sa San Remigio nga gipangulohan ni Olivar tumong sa maong proyekto.
Usa sa nasabutan nga ang lungsod ang mohatag sa luna nga dili mominus usa ka ektarya nga mahimutangan sa CTU campus.Apan matud pa ni Martinez nga ang gitanyag sa lungsod mao ang ilang usa ka ektaryang luna sa sports complex sa barangay Poblacion diin nahimutang usab ang Technical Education and Skills Development Authority training center.
Nunot niini nagtinguha si Martinez sa napalit nga luna sa lungsod sa barangay Tambongon nga maoy tukuran sa CTU campus. Gikataho nga mosugod na unta sa pagbukas ang CTU campus sa San Remigio sa miaging tuig apan wala kini nadayun. (Gregg M. Rubio/EIM) (BANAT NEWS)