Koryano nalumos

CEBU, Philippines - Patay nang napalgan ang usa ka Koryano ilawom sa kadagatan sa usa ka dakong hotel sa Brgy. Punta Engano dakbayan sa Lapulapu sa milabay’ng buntag.

Ang biktima mao si Kim Seong Soo, 34 minyo usa ka Korean national nga kasamtangang nagpuyo sa maong hotel. Sa pasiunang imbestigasyon ni PO3 Lydo Pinos sa Homicide section sa kapolisan sa dakbayan sa Lapulapu nasuta nga  sa alas 10:08 sa milabay’ng buntag napalgang nalumos si Kim sa kadagatan sa maong resort.

Sa imbestigasyon nasuta nga si Kim uban sa iyang asawa ug anak nagbakasyon sa dakbayan sa Lapulapu ug nagpuyo sa maong hotel resort  diin  kini  nagparehistro sa usa ka snorkeling lesson sa maong hotel.

Ang unang session ni Kim alas 7:40 sa buntag ug human sa usa ka oras mipahulay kini ug mibalik sa dagat alang sa iyang ikaduhang session, apan pipila ka gutlo usa ka babayeng Koryana ang mitawag sa atensiyon ni Nino Sayud, usa ka lifeguard sa maong hotel ug nagpahibalo nga dunay tawo ilawom sa dagat nga wala na maglihok.   Gumikan niini si Sayud ug si Cris Cyril Sator, laing lifeguard miluwan dayon  sa usa ka rescue boat  ug  si Kim   nga namonbon  na  giladmon nga  13.5 metros gisakwat  dayon  ug  gidala  sa baybayon.

Usa ka guest sa maong hotel nga si Dra. Bernadette Felomina Arjonillo-Rea misuway sa pagluwas sa biktima pinaagi sa Cardio Pulmonary Resuscitation (CPR) apan wala na moresponde ang lawas ni Kim hinungdan nga gidala kini sa Mactan Doctors hospital apan gideklarar nga DOA ni Dr. Camille Tan.

Nagduda ang kapolisan nga giatake sa sakit  sa kasingkasing  ug  walay foul play   ang kamatayon niini.   Ang patay’ng lawas ni Kim  gikatakdang dad-on og balik ngadto sa nasud sa South Korea karong adlawa. (BANAT NEWS)