CEBU, Philippines - Duha ka mga tawo ang gipamusil human gidudahang nalambigit sa illegal drugs trade sa managlahing lugar sa lalawigan sa Sugbu, usa kanila giingong gipusil kay namaligya kini og ‘shabu’ nga gisagolan og ‘iodized salt.’
Patay na si Renato Rupita, 39, nga taga Sitio Dasiga sa barangay Don Andres Soriano sa siyudad sa Toledo dihang napalgan nga nagbuy-od sa dalan sa miaging gabii.
Si Rupita gidala sa Carmen Copper Corporation Hospital ug gibalhin sa Vicente Sotto Memorial Medical Center apan gideklarar nga dead on arrival na tungod sa pinusilan sa liog ug tiyan.
Narekober sa kapulisan ang mga kabhang sa .45 nga pistola nga gituohang gigamit sa mamumuno. Ang kapulisan nakakita usab og upat ka mga gagmay’ng pakete sa shabu, P13, kutsilyo ug cellphone gikan sa biktima.
Supt. Henry Biñas, hepe sa Toledo City Police Station, mibutyag nga nakadawat sila og impormasyon nga nakapamaligya og shabu si Rupita nga adunay sagol nga iodized salt. Matud pa adunay mga drug user nga nangreklamo niini.
Si Biñas midugang nga ang maong reklamo maoy hinungdan nganong gipusil patay ang biktima. Si Rupita usa lamang ka street pusher nga ginagmay lang og dala.
Samtang gipusil patay ang usa ka Alejandro Sipalay, 34 nga gituohang namago sa iyang gipalit nga gidiling drugas hinungdan nga gibirahan kini didto sa barangay Tinaong lungsod sa Consolacion niadtong niaging alas10:00 sa gabii.
Matud ni SPO3 Roy Susvilla, imbestigador sa Consolacion Police Station kalit lang gipusil sa wala pa mailhing mamumuno.
Tulo ka kabhang sa kalibre .45 nga bala ug laing duha ka kabhang sa caliber .40 nga bala ang nakit-an sa crime scene.
Matud ni Susvilla,nakadawat sila og impormasyo nga ‘namago’ sa halin sa illegal nga drugas ang biktima. (Ria Mae Booc, Darrel Carumba ug report nila ni Chelsea Quijano ug Ray Anthony Espedido, CNU Interns/EIM) (BANAT NEWS)