CEBU, Philippines - Upat ka mga Sugboanon ang naapil sa topnotchers sa March 2013 Licensure Examination for Teachers.
Sa elementary level si Jestoni Limpangog Potot sa University of Cebu Lapu-Lapu -Mandaue nakakuha og gradong 88.20 porsiyento ang nahimutang sa top 4 ug si Junnalie Labajo Brago sa Talisay City College nga nakakuha og gradong 87 porsiyento ang nahimutang sa top ten. Sa secondary level, si Sheila Mae Mangubat Diano sa Cebu Normal University nakakuha og gradong 90.80 porsiyento ug nahimutang sa top 7 samtang si Angielo Labajo Pahamutang sa Talisay City College gihapon nakakuha og gradong 90.20 ang nahimutang sa top 10.
Base sa report sa Professional Regulation Commission (PRC) ug Board for Professional Teachers (BPT) nga sa 37,117 nga mikuha sa Licensure Examination for Teachers (L.E.T.) sa elementary 10,310 o 27.78 porsyento lang ang nakapasar.
Samtang sa secondary mikabat ngadto sa 38,433 ang mikuha sa pasulit diin 15,223 o 39.61 porsyento lang ang nakapasar.
Ang LET gipahigayon niadtong Marso 10, 2013 sa 14 ka mga testing centers lukop nasud ug ngadto sa Hong Kong. (Brenda D. Batuto/EIM)