CEBU, Philippines - Ang Department of Social Welfare and Development (DSWD-7) bag-ohay lang nagpahigayon og usa ka leadership training sa 20 ka survivor sa trafficking nga gikan sa probinsya sa Sugbo sa tumong nga makaorganisar og grupo nga mahimong suporta sa lain pang mga benepisyaryo.
Matud pa ni Rosemarie Salazar, focal person sa Family and Women Welfare Program sa DSWD 7 sukad maimplementar nila kining maong programa duha na ka tuig ang milabay, ilang nakita ang panginahanglan sa pag-organisar og grupo sa mga benepisyaryo niini ilhon base sa ilang potensyal sa pagka-leader
Si Fr. Loreto Jaque nga usa ka diocesan nga pari nga nabansay usab sa Expressive Arts Therapy mao ang nanguna sa maong pagbansay-bansay
Matud pa ni Kerwin Macopia, tigpamaba sa DSWD 7 nga ubos sa programang National Household Targeting System for Poverty Reduction (NHTS-PR), si Fr. Jaque midumala og usa ka healing process pinaagi sa usa ka makalingaw nga matang sa arte.
Dugang pa ni Macopia nga sa nangaging kasinatian ni Fr. Jaque uban sa iyang pasyente lakip na kadtong kadudahan nga maghikog , ang pari maoy mitambal kanila.
Gipadayag ni Macopia nga ang maong pagbansay-bansay nagpasabot nga ang pagpalambo sa leadership skills mahinungdanon kaayo ngadto sa mga nabiktima sa trafficking aron mabawi nila ang ilang maayong pamatasan ug ang normal nga lakaw sa ilang kinabuhi.
Gibutyag ni Macopia nga sa maong training nakatabang sa mga hingtungdan sa ilang sakit nga kasinatian nga lakaw sa kinabuhi gikan sa mi-rekurida kanila hangtud sa aktuwal na nga gitrabahoan nila. (BANAT NEWS)