LTO mopatuman sa Road Heroes program

CEBU, Philippines — Ang Land Transportation Office-7 andam na’ng mopatuman isip permamente nga programa ang “Road Heroes”, usa ka inisyatibo nga magpasidungog sa mga ordinaryong lungsoranon nga motabang sa mga otoridad sa pagpalambo sa kaluwasan sa kadalanan ug sa pagtubag sa mga emerhensiya kalabot sa trapiko.

Kagahapon, si Atty. Wendel Dinglasan, LTO-7 director nagkanayon nga ang maong programa nadasig sa gibuhat sa usa ka responsableng lungsoranon kinsa nitabang sa mga otoridad sa pagdakop sa usa ka motorista nga nalambigit sa hit-and-run nga insidente sa Sugbo.

Gitumbok niya nga ang pagsiguro sa kaluwasan sa kadalanan dili lang responsibilidad sa gobiyerno ug sa LTO katungdanan usab kini sa matag lungsoranon.            

Matud ni Dinglasan nga ang “Road Heroes” mahimong kabahin sa padayon nga kampaniya sa ahensiya aron mapalambo ang partisipasyon sa publiko sa pagpasiugda sa kaluwasan sa kadalanan sa tibuok Central Visayas.

Isip kabahin sa maong programa, pormal nga gipasidunggan sa LTO-7 si Jan Clifford Godinez, usa ka responsableng lungsoranon kinsa nitabang sa pagpahunong sa usa ka motorista nga nalambigit sa hit-and-run nga insidente diha sa M. Bacalso Avenue niining siyudad niadtong Martes sa buntag.

Gipadayag ni Dinglasan nga tumong sa maong pagpasidungog aron madasig ang daghang lungsoranon nga motabang sa mga otoridad panahon sa mga emerhensiya diha sa kadalanan imbes nga mag-video lang gamit ang ilang mga cellphone.

Dugang ni Dinglasan nga ang pag-ila sa paspas nga aksyon ni Godinez gituyo aron madasig ang daghang lungsoranon nga molihok nga responsable ug motabang sa mga otoridad kon makasaksi kini og emerhensiya sa kadalanan o mga insidente sa trapiko. (BANAT NEWS)