Sibat sa bloodbath

Sa kataposan, makaangkon na si Bise Presidente Sara Duterte og kahigayonan sa pagmatuod sa gipasidaan nga bloodbath sa iyang pag-atubang sa mga namasangil niya ug sa senator-judges atol sa impeachment trial.

Ang dugay nang gipaabot nga husay mao ang labing saktong forum aron mobanaw ang dugo --dili pinaagi sa pisikal nga bugno-- kon dili pinaagi sa makabungog nga kamatuoran, mga dokumento, ug lig-on nga testimoniya pagpanalipod niya. Ang impeachment trial dili lit-ag batok niya. Mao kini ang labing taas nga matang sa due process aron malimpiyo ang iyang ngalan.

Ang impeachment trial mao ang plataporma nga gitakda sa 1987 Constitution pagpaningil sa dagkong mga opisyal nga dili makiha sa ordinaryong korte. Ang paglikay ni VP Sara dili timaan sa kaisog, kon dili sa kahadlok.

Ang tinuod nga lider nga walay gitagoan dili moluklok; hinuon, iyang atubangon ang iyang mga nanaway niya sa impeachment court. Aron tagsa-tagsaon pagbungkag ang mga akusasyon batok niya. Ang pag-isnab sa proseso nagtimaan nga kutob ra siya sa istorya.

Nanumpa si VP Sara sa pagpreserbar ug pagpanalipod sa Konstitusyon. Ubos sa Article XI, ang impeachment usa ka sagradong mekanismo sa accountability. Dili siya ray magbuot moapil ba o dili. Iyang obligasyon ang pag-atubang aron paghatag og kuwentada giunsa niya paggasto ang buhis sa katawhan.

Kon iyang lawgawon ang proseso pinaagi sa walay kinutoban nga technicalities sa iyang mga abogado, wala lang niya magbugal-bugal sa House prosecutors ug senator-judges; iyang gipakita sa matag Pilipino nga ang rule of law mag-agad lang sa iyang personal nga kasayon.

Kining impeachment trial dili lang parte ni VP Sara. Maka-apektar sab kini sa umaabot. Kon iyang normalisahon ang pag-isnab sa accountability, gihukasan niya og gahom ang umaabot nga mga institusyon sa pagpaningil sa kurakot nga mga opisyal.

Ang pagkakak ni VP Sara dili makapapas sa nangalisbo nga kabilin sa katalawan sa iyang amahan ug mga igsuon. Masemento ang pakauwaw sa tibuok nilang pamilya nga bagis mga manghagit pero mangluspad nga motago kon suklan na. Gilikayan ni kanhi presidente Rodrigo Duterte ang mga husay sa iyang kaso sa International Criminal Court. Nahibawo na kita kinsay giliwatan ni VP Sara.