Bata naipit sa bato, nalumos

CEBU, Philippines — Patay ang usa ka 14-anyos nga batang lalaki human maipit ilawom sa dakong bato ug malumos samtang naligo sa suba sa Sitio Ylaya, Barangay Putat, Tuburan, Cebu niadtong hapon sa Domingo, Hunyo 28.

Ang biktima, residente sa Purok 2 sa maong barangay, gidala pa sa Tuburan District Hospital apan gideklarar na nga dead on arrival sa mga doktor.

Base sa inisyal nga imbestigasyon sa Tuburan Municipal Police Station, naligo ang biktima uban sa laing 14-anyos nga mga kauban sa bahin sa suba nga gitawag sa mga lumulupyo nga “Hidden Paradise” o gitawag usab nga “Tago Anggaw”

Nasayran nga misawom ang biktima paingon sa usa ka dakong bato nga adunay natural nga lungag ilawom sa tubig diin kasagarang moagi ang mga manlalangoy aron makagawas sa pikas bahin.

Apan paglabay sa pipila ka gutlo, namatikdan sa iyang kauban nga wala na kini migawas og balik gikan sa maong bangag.

Tungod niini, nisawom usab ang iyang kauban aron siya pangitaon ug didto kini nakit-an  sa ilawom nga naipit ilawom sa dakong bato.

Gidala dayon siya ngadto sa daplin sa suba diin gitabangan sa mga tawo pinaagi sa paghatag og cardiopulmonary resuscitation (CPR) sa wala pa gidala sa ospital.

Matud pa sa kapulisan, adunay mga samad ang biktima sa iyang agtang ug tuo nga bahin sa lawas nga gituohang naangkon atol sa iyang paningkamot nga makagawas gikan sa pagkaipit ilawom sa bato.

Sa usa ka Facebook sa usa ka netizen nga “Charmaine” gi-post niya ang maanindot sa sapa sa Tago-Anggao dungan sa pagpahimangno sa mga mosuroy ug mangaligo sa lugar nga mag-amping gyud sa ilang pagpangaligo didto human sa pagkalumos sa bata. “Bisan pa ug suhito na mo ani nga lugar o anad na mo magkaligo diri, ayaw gyud pakampante. Unaha pirmi ang safety ug kung mahimo likayi na lang pod ang pag anhi diri dapita labi na kung walay daghan kauban. Amping kanunay, ug respetohi ang kinaiyahan,” matud pa sa iyang post.

Samtang nagpadayon ang pahimangno sa mga awtoridad ngadto sa publiko nga mag-amping sa paglangoy sa mga suba ug uban pang natural nga katubigan, ilabina sa mga lugar nga adunay mga bato nga natabonan sa tubig, aron malikayan ang susamang insidente. (BANAT NEWS)