Fire hydrants pangsirad-an   

CEBU, Philippines — Gipasirad-an sa Metropolitan Cebu Water District (MCWD) ang mga fire hydrants sa tibuok Metro Cebu aron masigurong walay mausik nga tubig samtang opisyal nang gideklarar sa Philippine Institute of Volcanology and Seismology (PHIVOLCS) nga nagsugod na ang El Niño sa nasud.

Suma pa sa MCWD, ang lakang kabahin sa ilang mas lapad nga programa sa pagpakunhod sa non-revenue water (NRW) nga naglangkob sa pagkawala sa tubig tungod sa mga pagtulo, pagpangawat, ug pag-usik, ug dili angay nga paggamit sa mga fire hydrants.

Gibutyag ni Cebu City Mayor Nestor Archival nga kada adlaw adunay pagkawala sa kita sa MCWD tungod sa NRW nga mokabat na sa ?6.5 milyones apan ang General Manager sa MCWD nga si Atty. DX Lapid nagkanayon nga misaka na kini sa ?8 milyones matag adlaw.

Gisaysay sab ni Lapid nga bisan pa sa mga reklamo gikan sa kagamhanan, gipadayon sa MCWD ang pagsira sa kadaghanan sa mga hydrants tungod sa nagkadaghang kaso sa pagpangawat og tubig ug sa posibilidad nga makontaminar ang potable water supply.

 “Daghan kaayo’g mangawat ug tubig, ug ang epekto ang kato nuong among mga kunsumidor, walay tubig. Maka-contaminate pa gyud siya sa potable supply,” matud ni Lapid.

 Samtang, ang Assistant General Manager for Operations nga si Engr. Edgar Ortega nakamatikod nga ang pag-usik sa tubig tungod sa mga daan ug dunot nga mga fire hoses nga gigamit sa pagkuha og tubig.

Nahibaw-an sab nila nga ang tubig gikan sa hydrants gipamisbis sa mga tanom ug pagpuno sa pribadong swimming pools maong gipahugtan ang pagdumala karon niini.

Libre sad kaniadto ang  tubig sa mga hydrants kay barato pa ang presyo sa tubig, apan karon dili na ni mahimo.

 Gisugdan sa MCWD Board niadtong 2023 ang pagbutang og metro ug limitasyon sa paggamit sa mga hydrant isip kabahin sa ilang corporate social responsibility program.

Matud pa ni Lapid, misaka na usab ang gasto sa produksiyon sa tubig gikan sa ?24 kada cubic meter kaniadto ngadto sa ?45 hangtod ?49 kada cubic meter karon.

Nakig-alayon sab ang MCWD sa Bureau of Fire Protection (BFP) aron adunay mga gitakdang metered hydrants nga gamiton alang sa mga insidente sa sunog.

Gikinahanglan usab nga mopahibalo ang mga bombero o responders sa MCWD sa panahon sa alarma aron mahatagan dayon og suporta sa mga personnel nga naka-duty 24 oras matag adlaw.

Gisaysay sab ni Lapid nga ang mga fire trucks mamahimong mag-refill sa mga estratehikong hydrants sa N. Bacalso, V. Rama, Labangon BFP ug Lahug.

Gisuportahan usab ni Mayor Archival ang mas hugot nga palisiya sa MCWD nga nag-ingon nga ang mga fire hydrants kinahanglan lamang ablihan sa mga lugar nga adunay igo nga pressure ug sa mga awtorisadong personnel. (BANAT NEWS)