Hingpit nga umento sa toll rate sa CCLEX ipatuman sa Oktubre

CEBU, Philippines — Sugod karong Oktubre 1, 2025, ang Cebu-Cordova Link Expressway (CCLEX) mopatuman na sa full toll rate adjustment human kini giaprobahan sa Local Toll Regulatory Council (LTRC).

Ang LTRC mao ang ahensiyang nagdumala ug nagtino sa toll rates sa maong expressway ug sukad nga nasugdan ang operasyon sa CCLEX niadtong 2022, gipatuman lang una sa Cebu Cordova Link Expressway Corporation (CCLEC) ang partial nga toll rate bisan pa man nga miuyon kini daan sa full rates.

Ang bag-ong toll rates ubos sa hingpit nga implementasyon mao ang P68 – Class 1M alang sa mga motorsiklo nga 110cc hangtod 399cc; P107 – Class 1 alang sa mga motorsiklo nga 400cc pataas, pribadong sakyanan, jeep, pickup, ug gagmay nga mga van; P214 – Class 2 alang sa mga light trucks, bus, ug high-roof vans, ug P321 – Class 3 alang sa mga dagkong truck, multi-axle trucks, ug       trailers.

Ang mga Public Utility Vehicles (PUVs) ug Class 1M nga mga motorsiklo nga adunay RFID dili una ipailawom sa full toll adjustment sulod sa tulo ka buwan sa tinguha nga mapagaan ang bayrunon matag adlaw.

Sa maong tulo ka buwan, ang Class 1M RFID users pabilin nga mobayad og P65 samtang ang PUV operator nga adunay RFID mobayad og P200.

Gipasabot sa CCLEC nga ang pagsaka sa bayranan kabahin kini sa staggered toll adjustments nga gipatuman matag duha ka tuig subay sa Concession Agreement tali sa Kagamhanan sa Dakbayan sa Sugbo, Cordova ug CCLEC.

Dugang pahayag pa sa CCLEC nga gikinahanglan ang pagsaka sa toll rate aron mapadayon ang kalidad sa serbisyo, mamintinar ang dalan, ug alang sa kaayohan sa umaabot nga mogamit sa maong dalan gikan sa Dakbayan sa Sugbo paingon sa Lungsod sa Cordova. (BANAT NEWS)