CEBU, Philippines — Gipanghatagan sa kagamhanan sa Dakbayan sa Talisay og kagamitan ang mga magtutudlo ingon man mga tinun-an.
Si Talisay City mayor Gerald Anthony “Samsam” Gullas nibutyag nga sa ilang tigom sa Local School Board uban sa mga opisyales sa Department of Education (DEPED) sila nagkauyon nga mohatag og 358 ka toners para sa photocopiers nga una na nilang gihatag.
Matud pa ni Gullas nga ang photocopiers maoy usa sa dako nga tabang sa mga magtutudlo.
Suma pa ni Dr. Arden Monisit, school division superintendent nga iyang gihatag ang trabaho ngadto sa non-teaching personnel sa photocopier aron sila ang modumala niini ug pagtabang sa mga magtutudlo pagprinta og modules alang sa ilang mga tinun-an.
Gihatag sab ang Teacher’s Journal sa magtutudlo nga tipik sa regalo sa magtutudlo nga unta adto ihatag sa Teacher’s month.
Sa miaging tuig, nakadawat sab sila og Mobile Wifi nga maoy pagpakita og pasalamat sa kagamhanan ngadto sa mga magtutudlo nga ilang katambayayong sa pag umol ug pagpakat-on sa kabataan.
Si Gullas nitataw nga ang robotics gihatag sa Science High School aron dugang nila nga pagkat-on.
“With all of these, we aim to provide more in our education system, as we are helping every student's dreams come true,” asoy pa ni Gullas.
Dugang pa niya nga dili lang ang Talisay City Science School ang makadawat niini tungod kay sila naningkamot nga makahatag sab sa uban nga eskwelahan. — MEL (BANATNEWS)