NYC mohatag og pasidungog sa nursing student

CEBU, Philippines — Pasidunggan sa Regional Cluster Head Guian Paulo Godofredo sa National Youth Commission Visayas si Angyl Faith Ababa ang tinun-an sa nursing sa University of Cebu sa iyang bayanihon nga gihimo sa pagsalbar sa kinabuhi ni Bernadeta Zamora, manindahay og prutas kinsa giabis ang liog sa iyang kapuyo niadtong nakalabay nga Lunes.

Matud ni Godofredo nga mohatag sila og KABAYANI Award kun “Kabataang Bayani” tungod kay ang gihimo ni Ababa usa ka bayanihon nga buhat nga girisgo niini ang iyang kinabuhi sa pagsalbar sa maong manindahay og prutas.

Si Godofredo nagkanayon nga mahimong balikan sa suspetsado ang maong batan-on apan wala niini panumbalinga tungod kay anaa sa sulod sa kasing-kasing niini ang pagtabang ug nisakripisyo kini sa iyang kaugalingon aron maluwas si Zamora.

Ang gibuhat ni Ababa talagsaon kaayo ug nakadayeg siya niini diin magsilbi kini nga ehemplo ug inspirasyon sa mga kabataan.

Gibutyag ni Godofredo nga mapasigarbohon siya sa gipakita ug gibuhat ni Ababat nga gitabangan ang samdan nga ginang susama sa usa ka bayani nga andam irisgo ang kinabuhi alang sa kaayohan sa katawhan ug sa pagtabang sa nagkinahanglan.

Ang gihimo ni Ababat nagpakita nga ang kabataan maoy paglaum sa atong katilingban sama sa nabantog nga bayani nga si Dr. Jose Rizal.

Ang maong pasidungog ihatag kini nila Godofredo kang Ababa sa sunod semana.

Si Konsehal Rey Gealon sa Dakbayan sa Sugbo niduso ug resolusyon sa paghatag ug pagdayeg sa bayanihon nga gihimo ni Ababat ug sa tunghaan usab niini ilabi na sa pagtudlo sa ilang mga tinun-an kalabot sa mga basic sa pag-atiman sa mga samaran.

Ang maong resolusyon ni Gealon ihatag kini kang Ababa tungod sa nahimo niini ug lakip usab sa iyang tunghaan. (BANATNEWS)