Nasunogan sa brgy Punta Princesa nahawanan na
CEBU, Philippines — Gipahibawo ni Atty. Gerry Carillo, Chairman sa Cebu City Disaster Risk Reduction Management Council (CCDRRMC) nga 90 porsyento na nga nahawanan ang mga lugar nga naigo sa sunog diha sa barangay Punta Princesa.
Suma pa ni Carillo nga magpadala sila og graba sa dapit aron pag-abuno sa lugar tungod kay mobaha kini gumikan kay nawagtang na ang sapa sa tungod sa kabalayan.
Si Punta Princesa Barangay Captain Atty. Eleno Andale nagtinguha nga ibalik ang sapa sa dapit ug mao sab kini ang tinguha ni Mayor Michael Rama.
Gitug-an ni Atty. Carillo nga iduso nila sa Konseho sa siyudad sunod semana ang galastohan sa nahitabong kalamidad lakip na ang financial assistance nga ipanghatag sa mga biktima sa sunog.
Makadawat og P20 mil nga ayuda gikan sa siyudad ang nanag-iya og panimay nasunog man o wala basta maapektuhan sa himoong re-blocking. Ang mga nag-abang ingon man ang sharer ug ang absentee landlord makadawat og tag P10, 000.
Ang pundo alang niini ingon man sa pag-abang og heavy equipment adto kuhaon sa Quick Response Fund sa CCDRRMC.
Nasayran ang siyudad nipalit og 200 ka container vans nga ibutang sa 1,500 square meters nga luna nga naa nahimutang sa Sitio Tuburan aron didto una temporaryo nga mopahiluna ang mga nasunugan.— MEL (BANATNEWS)
- Latest
