TCPS dunay usa ka tawong gitutokan

CEBU, Philippines — Gipahibalo sa Talisay City Police nga aduna karoy usa ka tawo nga ilang gitutokan kalabot sa pagpatay sa 10-anyos nga batang babaye. Ang maong tawo giingong usa sa upat ka mga giisip nga ‘persons of interest’ sa maong krimen.

Si TCPS Police Chief, Lt. Col. Randy Caballes miingon nga nalahi kining maong tawo sa ubang POIs base sa nahipos nilang mga pamahayag gikan sa mga testigo.

Kining tawhana giingong nakit-an diha sa lugar kun diin napalgan ang patay’ng lawas sa biktima sud sa gamay nga langub. Nahuman na ang otopsiya apan wala pa makuha sa kapolisan ang report bahin niini.

“Ato ng na-interbyu  kato tanang tawo nga naligo (sa sapa) apil mga bata sa area, then naa na tay nakuha nga person of interest. Nag- gather nalang ta og additional witnesses,” matud pang Caballes kinsa nagdumili paghatag pa og dugang impormasyon bahin sa imbestigasyon.

Unang gipahibalo sa kapolisan nga dunay upat ka mga tawo silang giisip nga POIs nga posibleng maoy responsable sa maong krimen, base kini sa mga pamahayag sa mga testigo.

Nanawagan si Caballes sa uban pang posibleng dunay kasayuran bahin sa nahitabo sa bata diha sa Sitio Napo, Brgy. Tapul sa pagtabang sa ilang imbestigasyon.

Ang bata na-missing niadtong Enero 6,2022 ug nakit-ang patay sud sa langub Enero 9, 2022 na sa buntag. Wala pa sab makompirmar kun gilugos ba gyud ang bata apan gituohang gipatay kini anang adlawa nga kini na-missing.— IBM (BANATNEWS)