Speed guns sugdan na og gamit sa siyudad
CEBU, Philippines — Nag-dry run na kagahapon sa pagamit og speed guns ang Cebu City Transportation Office aron masuta ang mga motorista nga nagpalabi og pagpakusog sa ilang dagan.
Subay kini sa hingpit nga implementasyon sa City Ordinance 2612 nga nagtagana og speed limits sa tanang sakyanan ug motor nga moagi sa mga lugar nga ubos sa hurisdiksyon sa Siyudad sa Sugbo.
Matud pa sa deputy chief for operations ug information officer sa CCTO nga si Paul Gotiong nga posibleng masugdan na sunod semana ang pormal nga operasyon sa speed guns.
"Sa pagka-karon, ato gyud nga gi-orient og maayo ang atong mga personnel sa pagamit niini aron smooth na ang dagan sa pag-implement niini.
Ug nagpaabot pud ta sa ubang supply sa speed guns," " matud pa ni Gotiong.
Gibaba-bana nga moabot ngadto sa 5-10 ka speed guns ang gamiton sa CCTO sa unang hugna.
Ang target nila nga pilot areas mao ang South Road Properties (SRP) , North Reclamation Area, ug Transcentral Highway nga dunay daghang na-report nga panagbangga kaniadto gumikan sa pagpakusog og dagan sa mga sakyanan ug motor.
Ang madakpan sa overspeeding makamulta og P2,000 ug upat ka oras nga seminar alang sa first offense ; P2,500, upat ka oras nga seminar ug tulo ka oras nga community service alang sa second offense, ug P3,000 ug pag-impound sa sakyanan alang sa third offense.
Alang sa mga sakyanan ug motorsiklo, ang speed limit nga 80 kph alang sa national primary roads, 70 kph sa national secondary roads, 60 kph sa national tertiary roads, ug 20 kph alang sa barangay roads.
Samtang sa buses, trucks ug dako nga mga sakyanan momintinar of 50 kph sa hawan nga dalan , 30 kph sa gamay nga dalan ug 20 kph sa dalan nga daghan kaaayo og mga tawo. —MEL (BANATNEWS)
- Latest