CEBU, Philippines — Higpit gihapon ang pagpatuman sa health protocols sa pagsaulog sa kapistahan ni San Juan kagahapon diha sa mga lungsod sa Santa Fe, Bantayan ug Tabuelan.
Si Mayor Ithamar Espinosa sa Lungsod sa Santa Fe nipahimangno sa iyang mga konstituwente ug sa mga nakapa-book na diha sa mga resorts sa lungsod nga ang mga maligo sa dagat kinahanglang motuman sa health protocols paglikay sa COVID-19. Si Espinosa nipahinumdum usab kini sa ordinansa sa lungsod diin gikan sa alas 5:00 sa buntag hangtud sa alas 6:00 sa gabii lang ang oras nga gitugot nga makaligo sa dagat sa ilang lugar.
Nunot niini, si Police Staff Sergeant Ver Hortelano sa Tabuelan Police Station nagkanayon nga gisigurado nila nga mapatuman ang health protocols sa lugar lakip na ang mga maligo diha sa dagat.
Dugang ni Hortelano nga mopahigayon sila og checkpoint diha sa kadalanan diin gilaoman nga adunay mga taga silingang lungsod sa Taburan nga mobisita diha sa Tabuelan sa pagsaulog sa kapistahan ni San Juan. —BDB (BANATNEWS)