CEMVEDCO nihangyo ipausab ang pipila ka probisyon sa kontrata

CEBU, Philippines — Giklaro sa 42 ka kapunongan sa vendors sa Carbon Public Market ang ilang baruganan sa modernisasyon sa nahisgotang merkado diin uyon sila sa modernisasyon apan dili sila gusto nga himuon kini nga pribado.

Matud sa presidente sa Cebu Market Vendors Multi-purpose Cooperative (CEMVEDCO) Erwin Gok-ong nga walay problema ang nagkadaiyang organisasyon  sa mga vendor sa pag-ugmad sa merkado apan duna lang silay ipausab sa pipila ka probisyon sa kontrata nga gipresentar sa Megawide Construction Corporation nga maoy developer proyekto.

Sa niaging adlaw ang Megawide niklaro nga ang kagamhanan sa Siyudad sa Sugbo ang mo-operate sa merkado.

Apan giingong napanglantawan ni Gok-ong nga susama gihapon kini nga pribado gumikan sa pipila ka probisyon.

Pipila sa buot niya nga ipausab mao ang kabahin nga ang Megawide maoy mokolekta sa market fees ug ubang charges kay sama kini nga nahimong pribado ang Carbon.

Si Gok-ong nagkanayon nga mas labing maayo ang gobiyerno gyud ang mokolekta.

Nihangyo usab ang mga kapunongan nga sa pito ka ektarya nga area nga gipanag-iya sa siyudad nga nasulod sa maong merkado gamay lang unta nga area niini ang pagadumalaon sa Megawide.

Samtang si Kapitan Mark Miral sa Barangay Ermita nibutyag nga wala siya’y supak sa himuon nga kalamboan sa Carbon Public Market apan dili sila pabor sa privatization niini nga makaapektar sa gagmay nga mga magpapatigayon ug iyahang mga kontituwente.

Matud ni Miral nga uyon sila sa maong proyekto ilabi na alang kini sa kahapsay ug turismo apan maayo usab nga sa maong plano walay maapektohan nga gagmay nga mga manindahay ug sa gatusan ka pamilya diha sa Ermita.

Si Miral nanghinaot kini nga pamation usab ang hangyo sa mga taga Sitio Bato nga dili mahilabtan ug tabangan nga mauyon ang ilang lugar ngadto usab sa modernization.

Sa laing bahin, sugod kagahapon ang buhatan sa Market Operations Division Cebu City anaa na nahimutang sa bag-ong building diha sa Unit II Carbon Public Market.

Ang karaang buhatan sa MOD gamiton kini sa Department of Interior and Local Government (DILG) Cebu City.

Si Irvin Cabales, market administrator  nagkanayon nga mas maayo nga anaa sila sa bag-ong building sa Unit II tungod kay ang maong edipisyo mao usab ang himuong relocation site sa mga vendor diha sa Warwick Barracks ug Freedom Park nga maigo sa kaugmaran. —Rowena D. Capistrano, Decemay P. Padilla/BDB (BANATNEWS)