Duha ka balikbayan gikuhaan og sample ug gipadala sa PGC

CEBU, Philippines — Ang Department of Health (DOH)-7 nipadala og samples ngadto sa Philippine Genome Center sa duha ka pasahero nga niabot sa Sugbo kinsa niagi diha sa Mactan Cebu International Airport gikan sa United States ug Dubai.

Kini aron mapiho kong infected ba sila sa new virus variant sa COVID-19.

Kini ang gitug-an ni Dr. Mary Jean Loreche, tigpamaba sa DOH-7 atol sa gipahigayong press conference kagahapon.

Matud ni Loreche nga ang samples gikan sa duha ka lalaki nga nagpangedaron og 54 ug 40-anyos kinsa pulos positibo sa COVID-19.

Si Loreche nagkanayon nga nipadala sila og duha ka sample ngadto sa Genomic Center alang sa genomic sequencing apan ang maong mga sample dili gikan sa unom ka pasahero nga gikan sa Central Visayas nga nakauban og biyahe sa unang Pilipino nga nataptan sa bag-ong virus.

Gitug-an ni Loreche nga niadtong Enero 7, 2021 ilang gipadala ang specimen samples sa 40-anyos nga lalaki kinsa niabot sa Cebu gikan sa US kinsa gihatagan og pagtugot nga makasulod sa nasud tungod sa pagka-dual citizen niini.

Ang 54-anyos nga lalaki usa ka returning Overseas Filipino Worker nga niabot niadtong Enero 16, 2021 gikan sa Dubai sa United Arab Emirates ug ang sample niini gipadala niadtong Enero 20, 2021.

Ug hangtud karon gipaabot pa ang resulta sa maong samples samtang ang nahisgutang duh aka gikuha og sample ang naa pa sa isolation center sukad sa ilang pag-abot.

Giklaro ni Loreche nga pagawson ang mga tawo nga subject sa genomic sequencing kong maabot na ang adlaw nga natapos na ang ilang quarantine period ug wala pa gihapon ang ilahang resulta.

Sa laing bahin, si Mayor Junard Ahong Chan sa Dakbayan sa Lapu-Lapu nagtinguha nga ang namauli nga mga OFW nga mga Oponganon anha ipahiluna sa mga hotel nga nahimutang sa siyudad sa pag-quarantine nila sulod sa pipila ka adlaw.           

Gipadayag ni Chan ang mao niyang tinguha atol sa ilang panagtagbo ni acting director Mae Codilla sa Overseas Workers Welfare Administration (OWWA) sa nilabayng adlaw.                                       

Nasayran nga ang mga hotel nga accredited sa Department of Tourism ug Department of Health mao lang ang tugotang maka-quarantine sa mga OFW nga mamauli. Dugang ni Codilla nga sa kasamtangan pipila lang ka mga hotel sa dakbayan ang na-convert isip quarantine facilities nga acredited sa DOTR ug DOH. —Romeo T.  Limpangog/BDB (BANATNEWS)