Free bus ride dugangan pa

CEBU, Philippines — Posibleng malugwayan pa ang “free bus ride” alang sa  katawhan sa Cebu City South District matud pang San Nicolas Barangay Kapitan si Clifford Niñal kinsa usa sa nga nag-organisar niini kauban si  Kongresista Rodrigo Abellanosa.

 Sukad sa miaging buwan  nagpadagan sila og usa ka dakong bus sa pipila ka rota sa Cebu City South District ug kapin na sa 10,000 ka mga tawo ang naserbisyohan niini.

Tungod sa kalamposan sa maong programa, target karon ni Niñal nga mopadagan usab og laing dakong bus sa north district.

Matud ni Niñal nga dili pa igo ang mga nagdagan nga pampasaheroang bus ug jeep sa kadalanan busa nakahuna-huha siya nga i-extend ang “free bus ride” ug dako kaayo kini og tabang alang sa mga nagtrabaho.

Gawas sa libreng sakay,  ang mga pasahero makadawat usab og libreng face mask ug alcohol nga tipik sa programa nila sa pakigbatok sa COVID19.

“Ang importante nga makatabang ta sa katawhan ilabi na sa kadtong naglisod sa pagpangita og kasakyan,” sumala pa ni Niñal. —IBM (BANATNEWS)

Talisay Police motuman “Bawal ang Mataba” program

Gabriel Bonjoc

CEBU, Philippines — Dakong uyon ang pangu sa kapulisan sa Dakbayan sa Talisay sa hagit ni PNP Chief Debold Sinas nga mohimo sila og upat ka minuto nga ehersisyo kada adlaw.

Si Police Major Gerard Ace Pelare niingon nga kaya niya ug sa iyang mga kaubanang polis ang pag- ehersisyo.

Matud pa niya nga 80 porsiyento sa iyang sakop pulos bag-ong polis busa anad sila sa pirme nga pasingot.

Una niini, si Sinas nihimo sa iyang programa nga “Bawal ang Mataba” aron ang mga polis sa nasud sakto sa lawas aron sa paghatag og serbisyo sa katawhan.

Nagkanayon si Pelare nga ang saktong lawas makahatag og maayo nga serbisyo ilabi na sa panahon nga magginukdanay sa mga kriminal. Dili lang sa maayong serbisyo nga mahatag sa katawhan kundi alang sab kini sa kaugalingon sa polis ug sa iyang pamilya. Gawas sa pag ehersisyo, matag adlaw sab nga gihatagan og mga maayong balita espiritohanon ang kapulisan tungod sa ilang pakig alayon sa religious sector nga walay kaluya sa paghimo niini.— IBM (BANATNEWS)