Mayor Gullas mipadangat sa iyang SOCA

CEBU, Philippines — Nihatag sa iyang pasidungog sa tanang mga frontliners ingon man mipadangat sa iyang pahasubo ngadto sa mga namatay sa covid-19 si Mayor Gerald Anthony “Samsam” Gullas Jr. sa Syudsd sa Talisay atol sa iyang ikaduhang State of the City Address (SOCA) kagahapong adlawa.

Ang iyang SOCA pinalahi tungod kay diha ra sa hawanan sa konseho niya kini gihimo diin menos ang tawo ug gipakita kini sa social media.

Nipabuhagay ang mayor sa iyang 8 point agenda kun diin nag una ang edukasyon.

Nagkanayon si Gullas, ang cream of the crop program alang sa mga kabus nga adunay katakos sa pagtungha sa mga iladong unibersidad iyang nahatag samtang syento por syento ang iyang suporta sa Department of Education (DEPED) sa bag-ong estilo karon sa pagtudlo gumikan sa pandemya.

Ikaduha mao ang aftercare program labot sa pakigbatok sa ilegal nga drugas.

Matud pa ni Gullas nga dili lang sa paghimo og hingusog nga operasyon ilang gihimo kundili apil na ang pagtagad sa mga nalambigit sa ginadiling drugas nga dili na moapil sa maong matang sa bisyo.

Padayon usab karon ang mga infrastructure human naa na sa new normal ang tanan.

Lakip na ang pag atiman sa kalikupan, paugnat sa kusog, torismo, pagpangandam sa mga panghitabo ug ang social services sama sa libreng laboratoryo, pagpa ospital ingon man libreng lubong.

Panghinaot sa mayor nga kini magpadayon hangtud sa mosunod nga mga adlaw, buwan ug tuig sa pagserbisyo sa Talisaynon. /MEL (BANATNEWS)