75 balay naugdaw sa Tangke

CEBU, Philippines — Naugdaw ang 75 ka balay sa sunog nga nahitabo diha sa Sitio Kilawan, Barangay Tanke, Dakbayan sa Talisay kagahapon sa buntag nga sa unang report nagsugod gikan sa mga tawong nag-welding.

Si Sr. Insp. Arnel Abella, fire marshal sa Syudad sa Talisay nagkanayon nga alas 10:25 sa buntag nila nadawat ang alarma, gibutang dayon nila kini sa second alarm ug third alarm tungod kay kabalayan ang dapit.

Matud pa ni Abella nga gikaingon nga didto sa panimay ni Anecita Bacacao nagsugod ang sunog samtang adunay nag-welding.

Usa sa hinungdan nganong daghang nangasunog mao ang kahagip-ot kaayo sa dalan padung sa dapit nga nasunog ug naglisod sa pagsulod ilang mga fire trucks. Sagad sa kabalayan mga ginama sa gaay ug kongkreto. /IBM (BANATNEWS)