Miscommunication sa qr coded pass
CEBU, Philippines — Giangkon sa Cebu City Police Office (CCPO) nga adunay miscommunication ang nahitabong pagsakmit sa mga police checkpoints sa mga bag-ong QR Coded Passes nga una nilang gidudahang peke.
Kagahapong adlawa, dunay 49 ka quarantine passes sa uptown area sa Dakbayan sa Sugbo. Sumala pang CCPO Officer in charge Police Colonel Cedric Earl Tamayo nga nagka miscommunication ang polis sa kadalanan ug sa lokal nga kagamhanan.
Matud niya wala sila maabisohi kalabot sa klase sa papel nga gigamit sa pag-imprinta sa stickers sa quarantine passes nga adunay QR codes.
Sumala pa niya, ang sagad sa ilang nakita “glossy” ang sticker apan sa mga bag-ong issue nga QR stickers ordinaryo lang hinungdan nga nagduda ang kapolisan ug ilang gisakmit.
“Naa lang miscommunication kay at first, glossy man to ang amo kasagaran nga makit-an nga stickers unya pag verify namu sa city hall niana man to nga nahutdan og glossy paper maong ang ordinary nalang nga sticker paper ang gigamit,” matud ni Tamayo.
Hinuon, gipangtawgan nila ang kapitan diin gikan ang gisakmit nga passes ug sila mipamatuod nga dili kadto peke.
Ang Barangay T. Padilla nagbutang og dugang sticker sa barangay nga adunay pirma sa kapitan nga nagpamatuod nga gikan kini kanila ug dili kinopya o peke. /IBM (BANATNEWS)
- Latest
