Liquor test sa dinakpan di una sa CCMC
CEBU, Philippines — Dili una sa Cebu City Medical Center himoon ang liguor test ug physical examination sa mga dinakpan sa bisan unsang krimen.
Kini aron pagprotehir sa panglawas sa kapolisan lakip na sa mga dinakpan.
Si City Legal Officer Rey Gealon nipadala og suwat kang Police Col. Josefino Ligan, director sa Cebu City Police Office, labot sa pagsuspenso una sa physical examination and test for alcohol intoxication for individuals for detention sa CCMC.
Matud ni Gealon nga mao kini ang pamaagi nga ilang nakita aron ka protehian ang tanan lakip ang mga police officers kinsa gikonsiderar nga mga frontliners.
Sumala pa ni Gealon nga ang ilang buhatan pabor sa tinguha sa hospital administrator sa pagbalhin sa pagpahigayon sa alcohol test sa liquor ban violators gikan sa CCMC ngadto sa CCPO Headquarters human adunay mga pasyente sa coronavirus nga anaa sa tambalanan.
Dugang pa ni Gealon nga delikado sa mga polis nga magdala sa mga badlongon ngadto sa CCMC aron ipaubos sa liquor test kay aduna may na-admit nga mga pasyente sa COVID-19.
Gitug-an ni Gealon nga dili angay i-expose ang kapolisan ilabi na importante kini sila isip mga frontliners sa sinsero nga paningkamot sa gobiyerno niining krisis nga giatubang karon.
Tinguha karon ang pag set-up og pasilidad sa CCPO alang sa maong procedures hinungdan nga bukas si Gealon alang sa coordination meeting alang sa maong kalihukan. /GMR (BANATNEWS)
- Latest
