Mga biktima sa investment scheme nidangop sa CIDG

CEBU, Philippines — Napulo ka biktima sa investment scheme o pautang ang nidangop sa Criminal Investigation and Detection Group (CIDG)-7.

Ang maong mga biktima nireklamo batok kang Clarisse Toledo kinsa giila nga maoy tag-iya sa United Treasure Credit Corporation.

Usa sa mga biktima nibutyag nga tulo na ka tuig siya nga miyembro sa UTCC ug naka-invest na siya og P380 mil lakip niini ang na-invest sa iyang mga anak.

Gibutyag sa biktima nga dihang bag-o palang siya nga miyembro sa UTCC aduna gyud siya’y makuha nga kwarta isip sharing sa matag unom ka buwan nga bahin sa mga miyembro.

Giingong sa unang share nakakuha siya og P10 mil gisundan kini og P3,800 ug ang kataposan P1,8000.

Gawas sa sharing matag unom ka buwan mamahimo usab nga makautang nga adunay 10 porsyento nga interest ngadto sa UTCC apan sa dihang mo utang unta siya ug ang ubang miyembro niini dili na sila pautangon.

Ug tungod niini nakadesider ang grupo nga ila nalang i-withdraw ang tanan nga kwarta nga gi-invest nila sa UTCC apan giingong dili na ma-contact ang suspetsado ug dili na usab kini mo atubang kanila.

Laing biktima kinsa giingong asawa sa ig-agaw ni Toledo ang nibutyag nga nisalig siya sa suspetsado tungod kay kadugo kini sa iyang bana hinungdan nga ni-invest siya og P150 mil apan wala na usab kini magpakita kanila.

Ang suspetsado gipatawag sa mga biktima ngadto sa barangay hall sa Pit-os aron atubangon sila niini ug mahatagan og rason apan wala usab kini moatubang hinungdan nga nangayo na sila og tabang sa CIDG-7.

Si Police Major Edgar Allan Tolosa, deputy regional chief sa CIDG-7 nagkanayon nga ang suspetsado mapasakaan kini og kasong estafa kong mapamatud-an nga peke o nangilad kini sa gihimo niining pautang scheme.

Kasagaran sa mga nabiktima ang mga bana niini seaman, negosyante ug mga investors sa Dakbayan sa Sugbo. /BDB (BANATNEWS)