P6 milyones balor sa marijuana gilarot

CEBU, Philippines – Mokabat sa P6 milyones nga balor sa marijuana ang nalarot sa mga elemento sa Cebu City Police Office (CCPO) City Mobile Force Company (CMFC) sa Sitio Manggabon, Barangay Tagba-o, Dakbayan sa Sugbo subay sa Oplan Vanadium.

Matud ni CMFC Force Commander, Police Lieutenant Colonel Randy Korret, nga usa ka residente ang nitug-an kanila sa plantasyon sa marijuana.

Nalarot ang gibana-bana 15,000 ka fully grown stalks sa marijuana gikan sa tulo ka sites ug gibanabana nga mobalor ngadto sa 6 milyones.

Nailhan sa kapolisan ang nagtanum sa marijuana nga si Robert Alcantara samtang padayon pa nga giila ang lain pang kauban niini.

Niuban sa operasyon ang mga sakop sa Philippine Drugs Enforcement Agency 7, Naval Forces Central ug mga opisyal sa barangay.

Sa laing bahin tinguha ni Korret nga magpahigayon og pagtanum og kawayan sa dapit isip tabang sa panginabuhi sa mga residente sa bukid isip alternative source sa pipila ka mag-uuma.

Ang maong plano gibuhat kini pinaagi sa advisory council sa CMFC nga maoy moabag sa mga seedlings nga mahimo nga livelihood program sa CMFC ug sa mga barangay sa bukid. /GMR (BANAT NEWS)