Kanhi polis patay sa buybust
CEBU, Philippines — Patay ang usa ka kanhi polis atol sa gipahigayong buybust operation sa Purok 1 sa Barangay Asinan sa lungsod sa Buenavista sa Bohol. Giila ang namatay mao si Kevin Hubac ,35 , nagpuyo sa maong lugar.
Matud ni Police Regional Office 7 Director Police Brigadier General Albert Ferro nga si Hubag maoy unang namusil sa mga polis mao nga kini napusilan ug napatay.
Si Police Captain Gereon Item, ang deputy chief sa Bohol Provincial Police Office Provincial Intelligence Branch mitug-an nga taudtaod na nilang namonitor nga namaligya og drugas si Hubac ug nalambigit na niini bisan niadtong sakop pa kini sa kapolisan.
Dugang pa ni Item, si Hubac gireklamo sab ngadto sa 8888 President Citizens Hotline nga nagingong nalambigit kini sa illegal nga drugas.
Atol sa gipahigayon nga drug test sa mga polis nga gidudahang nalambigit sa ilegal nga drugas, nagpositibo maong gibalhin kini diha sa Regional Holding and Accounting Unit (RPHAU) apan nag AWOL (absence without official leave) niadtong 2013.
Gawas sa kalambigitan sa drugas, giingong konektado sab si Hubac sa Torregoza Robbery Group sa Bohol.
Atol sa pagkapatay kang Hubac, nakuhaan kini og kalibre 45 pistola nga adunay mga bala, ug gidudahang shabu nga mobalor P157 mil.
Nibahad si Ferro niadtong mga kanhi polis ug aktibong polis nga tutokan gyud sila kanunay kun malambigit sa illegal nga drugas. /IBM (BANATNEWS)
- Latest
