22 ka barangay sa Talisay libuton alang sa serbisyo

CEBU, Philippines — Ang matag barangay sa Dakbayan sa Talisay makasinati kini og serbisyo gikan sa kagamhanan sa siyudad human si Mayor Gerald Anthony “Samsam” Gullas Jr. niuyon sa programa sa “Aksyon Agad sa Barangay”.

Ang siyudad gilangkuban kini sa 22 ka barangay nga gikatakdang libuton alang sa maong programa.

Ang maong programa maoy modala sa mga serbisyo sama sa libreng check-up medical, proseso sa birth certificate lakip na niini ang check-up sa iro ug iring ug uban pa.

Ang kapolisan sa siyudad makiglambigit usab sa maong programa diin mohatag sila og pagpasabot ngadto sa katawhan sa paglikay sa ilegal nga binuhatan ilabi na ang pagpamaligya o paggamit og ilegal nga drugas.

Matud ni Gullas nga gawas sa paghatag og mga serbisyo diha sa kabarangayan suportahan usab nila ang kalihukan sa kapolisan.

Ang programa sa kapolisan gitawag kini og “Oplan Kalinaw Talisay”.

Si Police Major Gerard Ace Pelare, hepe sa Talisay City Police Station nibutyag nga subsob ang ilang kampaniya sa ginadiling drugas apan ang maong programa palahi usab kin diin moduol sila ngadto sa katawhan aron pag-edukar. /BDB (BANATNEWS)