Gipatay sa anak

CEBU, Philippines — Usa ka lay minister ang gidunggab patay ug ang gitumbok nga suspek mao ang iyang minor de edad nga anak samtang kini natulog gawas sa ilang balay sa may Sitio Molave, Barangay Tabunok, Dakbayan sa Talisay, Sabado sa kaadlawon.

Ang nakalas mao ang 55 anyos nga amahan samtang ang suspetsado ang 17-anyos niining anak nga giingong adunay deperensya sa panghunahuna.

Matud pa ni Patrolman Eleazar Belciña, ang imbestigador sa maong kaso sa Talisay City Police Station, base sa inisyal nga imbestigasyon giingong naglagot ang anak sa iyang amahan hinungdan nga nikuha kini og kutsilyo ug gidunggab sa liog ug buko-buko ang biktima.

Ang biktima daling gidala sa tambalanan apan gideklarar kini nga dead on arrival tungod sa naangkon niining samad dinunggaban. Sa pagpangita sa kapolisan, nakit-an ang suspek nga naghigda-higda sa plaza sa Poblacion. Nailhan kini base sa iyang gisul-ob nga sinina ug nagkadugo pa ang mga kamot niini.

Gibutyag ni Belciña, base sa pakighinabi niya sa maong minor de edad giingong naglagot lang kini sa iyang amahan ug wala sa iyang mga igsuon.

Base sa pakighinabi ni Belciña sa pamilya nitug-an sila nga adunay kakulian sa pangisip ang maong batan-on ug sagad hinungdan sa pagkasuko niini kun dili mahatag ang iyang gipangayo.

Ang maong batan-on giingong mao usab unta kanunay ang katupad ug tulog sa iyang amahan apan niadtong pagkahitabo didto nakatulog ang amahan sa gawas kay gikan namilar sa ilang paryente.

Si Belciña nitug-an giproseso na nila ang dokumento aron sa pag turn-over sa maong minor de edad ngadto sa DSWD tungod kay giingong tinguha sa pamilya nga mapasakaan kini og kaso aron mahipos ilabi na nga magsuol-suol lang ang sakit niini. Sa pakighinabi ni Belciña sa inahan sa batan-on kini nitug-an nagsugod ang sakit niini sa dihang nagtungha sa high school diin bisan ug aduna kini giinom nga tambal mosugmat gihapon ang gipamati niini.

Wala hinoon masayod si Belciña kung asa nagserbisyo pagka lay minister ang namatay. /IBM (BANATNEWS)