Sacred Forces motabang sa mga biktima sa Ursula
CEBU, Philippines — Ang Sustaining the Archdiocese of Cebu’s Charity, Resiliency, Empowerment and Development by Forming and Organizing Resilient Communities and Empowered Stewards (Sacred Forces) sa Archdiocese of Cebu motabang sa mga biktima sa bagyong Ursula.
Ang grupo gilangkuban sa Caritas Cebu, Relief and Rehab Unit, Basic Ecclesial Community ug uban pa nagtambayayongay aron tabangan ang mga biktima nga gikuso-kuso sa bagyo.
Matud ni Fr. Charles “Cha-Cha” Jayme nga nakahatag na sila sa Barangay Logon nga mao ang Isla sa Malapascua sa Lungsod sa Daanbantayan og 600 ka food items ug non-food items; 508 non-food items Isla sa Carnaza; 1,307 food items sa Barangay Talisay sa mao gihapon nga lungsod.
Sumala pa ni Jayme nga ang food items gilangkuban sa bugas, de lata, pagkaon ug 6.6 liter distilled water samtang ang non-food items nagbase sa rapid assessment sa mga parish volunteers nga naglangkub sa 4m x 6m tarpaulins, 1/2 kg nga lansang, martilyo, water filters, solar lanterns, solar lamps ug senina.
Gitug-an ni Jayme nga niadtong Disyembre 25 nagpahigayon sila og assessment dayon niapelar ug pagka Enero 4 nagsugod na dayon sila sa pag-apod-apod sa mga hinabang.
Dugang pa ni Jayme nga padayon ang ilang apelar ngadto sa mga makatabang sa livelihood o pagpabarug sa gatusan ka balay nga nahagba tungod sa bagyong Ursula.
Tinguha usab karon sa Sacred Forces nga makapadayon pa ang pag-abag ug pagpabarug sa rehabilitation sa pipila ka katawhan nga naigo sa bagyong Ursula.
Ang RRU pinaagi sa Caritas Cebu bukas gihapon ni bisan kinsa nga ganahan mohatag alang sa ilang mga hinabang ilabi na sa pag-abag sa mga panginabuhian ug pagtukod usab sa ilang mga kabalayan. /GMR (BANATNEWS)
- Latest
