Festival of Faiths karong Sabado
CEBU, Philippines — Magtagbo ang lainlaing mga simbahan ug relihiyon atol sa Festival of Faiths: Enriching Friendships sa Plaza Sugbo karong Sabado.
Kini kabahin sa quincentennial celebration sa pag-abot sa imahe ni Santo Niño de Cebu kaniadtong 1521. Ang Simbahang Katoliko nag-obserbar sa 2019 isip Year of Youth nga kabahin sa siyam ka tuig nga pagpangandam alang sa pagsaulog sa 500 ka tuig nga Kristiyanismo sa nasud sa 2021. “There is this desire from different faiths to gather young people and give an awareness that we can be one amidst our differences,” matud ni Father Alvin Raypan, director sa Commission on Ecumenism sa Archdiocese of Cebu.
Mopresentar ang lainlaing grupo ug ang interfaith gitumong sa pagpaambit ngadto sa kabataan ug higayon sa ilang pag-ila-ila.
Apilan kini sa kabatan-onan sa Katoliko Romano, Muslims, Buddhist, Latter Day Saints, United Church of Christ in the Philippines (UCCP), United Methodists, Iglesia Filipina ug uban pa.
Gipaambit usab ni Raypan nga dunay managsama nga kalihukan nga gihimo sa komunidad sa interfaith sa pila na ka tuig karon sama sa Walk for Peace nga gipahigayon niadtong Septiyembre 21.
“We would like to give witness to a Cebu that is one,” matud ni Raypan.
Ang kalihukan gilauman nga tambongan sa usa ka libo ka kabatan-onan gikan sa lainlaing mga relihiyon diin sa pagkakaron anaa pa lang sa 650 ang nagparehistro.
Gidapit ni Raypan ang publiko sa pagtambong sa libre nga kalihukan nga magsugod sa alas 4 sa hapon. GMR (BANAT NEWS)
- Latest
