Pagpananaom og kahoy ipapananghid

CEBU, Philippines — Giawhag sa hunta probinsiyal sa Sugbo ang mga mayor sa matag lungsod ug dakbayan nga idili ang pagtanom og mga dagkung kahoy daplin sa mga dalan o highways nga walay igong permit o clearance.

Kini aron makalikay sa bisan unsa nga kontrobersiya kun ugaling adunay pamutlon nga kahoy alang sa road widening projects ug uban pang proyekto sa gobiyerno.

Sa resolusyon ni Bokal Thadeo Jovito Ouano gisaysay nga kinahanglan nga adunay permit o pagtugot sa Department of Environment and Natural Resources, Department of Public Works and Highways ug hingtungdang lokal nga kagamhanan.

Si Ouano nagkanayon nga daku ang tabang sa mga punoan sa kahoy sa kinabuhi sa mga tawo.

“Trees controls climate by moderating the effects of the sun, rain and wind, the leaves absorb filter the suns radiant energy, keeping things cold during summer, the trees preserve warmth by providing a screen from harsh winds, trees provide protection for everyone,” pagbasa sa resolusyon ni Ouano.

Nahimong init ang hisgutanan sa plano sa DPWH nga mamutol og mga karaang punoan sa kahoy sa Dakbayan sa Carcar ug Naga alang sa road widening project niini human nireklamo ang mga environmentalist.

Matud ni Ouano nga isip usa ka advocate sa public safety ug balanced and healthful ecology, niawhag siya sa mga organisasyon ug mga konstituwente niini nga gusto magtanom og kahoy ilabi na kadtong mga kilid sa dalan nga segurohon nga adunay igong permit o pagtugot sa mga hingtungdang ahensya sama sa DENR ug DPWH aron makalikay sa kontrobersiya kun mamutol og kahoy subay sa programa ug proyekto nga ipatuman sa gobiyerno. (/GMR)(BANATNEWS)