P11.5M shabu nasakmit
CEBU, Philippines — Mokabat P11.5 milyones nga balor sa gituohang shabu ang nasakmit gikan sa duha ka mga dinakpan sa gipahigayon nga hiniusang anti-illegal drug operation sa mga tinugyanan sa City Drug Enforcement Unit, City Intelligence Branch, PDEG SOU ug Philippine Drug Enforcement Unit sa may V. Rama Avenue, Barangay Calamba ning Dakbayan sa Sugbo kagahapon sa kaadlawon.
Ang nasikop naila nga sila si Mark Jovan Rosales, alyas Jovan, 29, taga A. Lopez, Barangay Labangon, regional level nga high value target sa kapolisan.
Apil sa nasikop si Malou Dela Peña, alyas Michelle, 41, lumad nga taga Nabunturan Davao Del Norte ug temporaryong nagpuyo sa maong dapit ug naapil sa drug watch list.
Ang grupo ni Police Lieutenant Colonel Frankie Jingle Vea Lugo nakasakmit sa fuha og 1,073 gramos nga gidudahang shabu nga nagkantidad og P11,580,400.00 base sa Dangerous Drug Board Value ug nabawi sab ang buy bust money.
Ang mga dinakpan nagtingkagol na karon ug pagsakaan og tukma nga kaso nga kalapasan sa Section 5 and 11 of Article II of R.A 9165.
Ang dinakpan nangangkon nga igo ra kini modawat sa supply sa ginadili nga drugas ug maoy mounay ug apod-apod ngadto sa iyang mga kaila dinhi sa dakbayan. (BANAT NEWS)
- Latest